PEGARI Iban Production

Agi mayuh bendar pendam kitai Iban nya pendam ari kelia ba tanah ke tumbuh kayu kampung bebesai sereta repa. Enti orang udah parai ditumbakka ba pendam; anak, uchu, ambu tauka kaban belayan nadai ati ka ngabas agi pengudah diintu (disemin/disungkup tauka dilumbung). Kati patut tauka enda kini pendam tuai diperesi? (ditebas buai kayu mit awakka kayu besai aja). Nama runding kitai? Peda jurai bala mayuh ba facebook aku.

Pendam lama ke udah diperesi

Pendam lama ke udah diperesi

Buah berunai

Jaku Iban ke bendar tauka chulin nyebut buah tu nya buah berunai. Mayuh kitai saru ngumbai ‘nenas tauka nanas’ nya jaku Iban ke chulin tang ke bendar, nenas tauka nanas nya ukai jaku Iban, enda milih ba ni-ni bagi menua tauka ni-ni bagi ai. Ketegal ti udah teleba nyebut ‘nenas tauka nanas’ dia rebak baru nyau nyebut buah nya ngena jaku Melayu. Nyau lama jemah ila, leka jaku berunai tau punas enda ditemu kitai rebak dudi agi.

Sebaka mega enggau mayuh leka jaku bukai ti nyau majak jarang dikena, ambika banding baka leka jaku; ngelih suah agi disebut overtake, resih nyau nyadi guring, andau tauka titi nyau nyadi jematan. Nya siti singkang ti enda dinamik ba pengerembai jaku Iban laban iya tau nasalka jaku Iban ti chulin.

Buah kacahng, sangki tauka chabi

Jaku Iban chulin nyebut buah tu buah kachang, buah sangki tauka buah chabi [chabi']. Dalam ensera nembiak, buah tu dikumbai ‘buah tamang raja’. Asai buah tu disebut kitai Iban  bisa, pedas, berangat tauka nyengat. Buah kachang mayuh bansa, lalu nama saintifik iya Capsicum annuum.

Ba main tauka tundi tradisyen bansa Iban, enti lebuh orang besua ke buah tu (tauka beberi), buah tu enda tau dijapai tauka diambi ari jari siku-siku laban mali seduai nya ka belaya dudi hari.

Grafik dikena manding jurai (kair gambar enti ka meda besai agi)

Nuan empu tanah kampung puang B, 3 kilometer penyauh ari jalai besai. Akih A, ngempu tanah kampung puang A. Akih B deka betanam sawit ba tanah iya, lalu deka ngaga jalai raya/alun ari jalai besai tang jalai nya mesti nengah tanah kampung puang akih A. Enti nuan nyadi akih A, nama runding tauka penemu nuan?????

=======================================================

Runding aku enti aku A baka di baruh tu. Runding tu runding sereta penemu aku kediri, enda mai orang bukai lalu enda mega mantah orang ti enda setuju enggau aku.

** Ungkus ngaga jalai pemanjai 3 kilometer, enti sewa piko RM100 sejam, lalu semina ulih ngaga 100 meter sehari nya RM24,000.00.

Enti aku A, aku ngemendarka akih aku B ngaga jalai ngerenchah tanah aku, enda ngira iya kaban belayan aku tauka orang bukai! Aku besetuju 100% lalu ENDA SEKALI-KALI minta pampas. Nih enti sema aku bisi duit, aku deka mantu iya mayar ungkus iya ngaga jalai nya naka ke ulih aku, taja pan iya enda minta. Enti iya minta, aku mega deka nulung, enggau penyampau ke ulih tapi aku. Dalam hal baka tu, kami duai bela bisi penguntung.

Tanah ke direnchah tauka kena bungkur ngaga jalai kebun nya enda besai. Sema ba tanah aku nya bisi kayu buah lalu akih B ka ngelaungka kayu buah aku ketegal irau ke aku enda setuju…., aku ngasuh lalu ngemendarka semua kayu buah aku nya dibuai awakka ungkus ngaga jalai ngelaungka kayu buah nya ulih dikurangka agi.

Nambahka nya, sema aku mega bekebun sawit ba tanah aku nya dudi hari ila, kos miki (maintenance) jalai mega deka bekunsi, aku enda ngelakka akih B nanggung kediri.

Kebuah aku besetuju tauka berunding baka nya laban aku chukup untung;

1. Rega tauka ‘value’ tanah aku ngenyit niki laban udah bisi jalai.
2. Ila lusa enti aku ka muka tanah aku betanam sawit tauka utai bukai, aku enda kiruh nyewa piko ngaga jalai nanggung ungkus kediri aja. Makin lama, sewa piko makin mar. 
3. Sema akih B udah maju bekebun, aku gaga enti iya beduit. Ambis nadai pan iya ulih mai aku ngirup kopi enti betemu ba kedai.
4. Sema iya udah maju, tentu iya bisi kerita (hilux), aku enda malu minta tulung iya mai barang tauka ngangkut barang aku maya aku begunaka kerita.
5. Ukai ngajihka rangkang ngachuk mata, sema aku bisi penusah, akih B tentu nadai penanggul ngesah aku laban aku udah manah enggau iya.
6. Sema aku deka ngetan bubu begunaka buah sawit ke umpan bubu, aku ulih minta setandan dua ba iya.
7. Aku mega ulih minta ngiga kulat sawit ba kebun iya, enda kiruh meli tauka ngining orang bukai.
8. Sema dudi hari aku deka mega bekebun sawit ba tanah aku, sebedau aku tebelika kerita, aku ulih minta tulung akih B ngangkut paung sawit, ngangkut baja ke kebun aku.
9. Sema akih B udah beduit ari ti besawit, lalu aku tu orang nupi babi, manuk, itit tauka ikan pegung ke dijual…., akih B tentu deka meli ari aku laban aku udah nyadi kaban iya. Bisnis aku pan ngerembai maju.

Rumah tu Rh. Ajie, Selepin, Bakong, Baram (Miri) digaga dalam taun 60an. Datai jalai raya. Berapa pintu enda ga nemu. Taja rumah lama, tang pengidup orang rumah nya moden baka orang bukai mega. Sema jaku, kerita bisi sebuah sepintu!! Sekeda bisi mega sampai 2, 3 buah kerita. Batang pengawa, betanam sawit.

Ni kita ke peranak menua Kapit? Aya tu ukai ka minta ngerejista diri ka sekula ba SK Methodist tang iya siku ari nembiak ke udah kala besekula ba sekula nya dalam taun 1957 suba!!!

Lamau Anak Dana, Sg. Tiaw, Mujong, Kapit

Datai ari  Sg. Tiaw, Mujong ke dipegai Tuai Rumah Tungku maya nya kelia, aya Lamau Anak Dana diatu ngentapka pendiau diri ba Rh. Ajie, Selepin, Bakong, Miri kenyau ari taun 70an kelia laban ke bulih sulu di menua nya. Iya mega suah begagai betundi, bemain sebelah parit, mesit enggau nyempulut burung begulai enggau James Masing, Billy Abit, Kenneth Kanyan sereta mayuh agi bala ke bukai ke udah jelai nama pegari rita kediatu laban sida nya mega bela besekula dia enggau iya.

Lebuh ke ditanya nama kebuah iya enda ga tebulihka pangkat doktor baka James Masing, engkakah iya ketawa madahka iya maya nya enda tentu ka sekula lalu suah enda datai laban ke gagit agi ati ka enggau orang di rumah panjai sida ba Sg. Tiaw, Mujong laban ke enggai tinggal makai tunu manuk maya nugal, ka nginti, ka nyala, rindu bemain pangka sebelah tengah laman, rindu malu sarang burung ganggang ti kekitang atas ai, enggai tinggal bala bakih nyabung kantuk kelindang di menua.

Silik agi pasal SK Methodist, Kapit keditau, kair >> http://skmethodistkapit.weebly.com/index.html